مواقف سكان المدينه

[موني]

شوفوا ابغى كل واحد يكتب موقف طريف ومضحك صارت في حياته

من باب الضحك فقط ....
:021: :021: :021: :021: :021: :021: :021: :021:

[موني]

واااي انا مررره لما كنت في المدرسه كانت عندنا اختبارات نهائيه وطبعا لما يكون عندنا فتره نقول لأهالينا فترتين ههههه عشان نطلع ونتصرمح يعني ندشر فكان الجو مررره حلو وطلعت انا والبنات مع السواق في البحر قال ايه نبغى نشم هوا ودخلنا البحر واتراب جا على مراييلنا وانعدمت وارجع البيت وماما تقولي فينك اقولها في المدرسه وهيه تطالع على الجزمه مليانه تراب من حقت البحر وانضرب داك الضرب مانساه ماحييت

[محروم المنال]

حلوه الفكره قد تصادفنا مواقف يوميه وحلوه ويمكن لنا ذكرها هنا على الساحه

بس اتذكر موقف وارجعلك تاني موني

محروووم

[lost-angel]

ههه تعيشي وتاكلي غيرها موني

ونستنى موقفك انت كمان محروم

[موني]

ابغى رد ومعاه موقف محروم ملوك يالله افتكروا

[محروم المنال]

طيب ياستي انا اقلك موقف صار ليا قبل يمكن سنه ونص.

كنت ابغا اطلع اجيب حاجه من الصيدليه جنب البيت المهم قلت يولد خليني اروح مشي احسن رياضه بدل كل شويه بالسياره, الحاصل
كنت ماشي في امان الله في جانب الشارع كاان عباره عن شارع في وسط الحاره وقبلو في لقه تطلع على هالشارع, شويه وانا ماشي قربت من جنب بيت من البيوت وكان نزال منو ولد عمرو يمكن 11 سنه او 12 وشايل في يدو كيس الظاهر انو حاجات راح يرجعها للبقاله او شي زي كدا المهم واضح انو اهلو مرسلينو والولد كانو ماصدق خرج من البيت يبغا يطلع للشارع ومن كتر ماهو مسرع ونازل من الدرج اول ماوصل للشارع طاح على وجهو وانا اطالع من جد كان موقفو يظحك ,,,



ولكن المفاجأه انو ياخوان والله زي مااقلكم انو كل اللي بيصير دا حصل قدام عيني وفي ثواني اول ماطاح الولد يدوبك جات سياره فيها شباب ومسرعين وكان طالع من اللفه يعني ماكانو ينشافو اصلا ولفو من جنب الولد والله انو مابين الولد والسياره الا اقل من نصف متر والشباب اللي في السياره طبعا ماكانو شايفين الولد...وقتها انا وقفت من هول الموقف وانقلب حالي من ظحك الى تعجب من قدرة الله سبحانه وتعالى ,,لولا لطفه ورحمته في هالولد وفي امه اللي راح تحزن عليه اكتر وحده الا انو كانو حيصير في خبر كانا,يعني لو ماطاح الولد كان جات السياره وصدمتو يمكن مو حيموت لا حيتقطع كمان ..فسبحان الله على رحمته وعطفه


هو دا موقف اللي فاكرو دحين موني وان شاء الله اتزكر غيرها

محروووووم

[موني]

سبحان الله من لطفه وربي كتبله عمر جديد الحمدلله شكرا

[محروم المنال]

هاتي انتي كمان موقف والا كيييف

[موني]

لا باقي ملاك اول بعدين انا اكتب موقف تاني

[lost-angel]

بجد ربنا كتب ليه عمر جديد

انشاء الله موني راح ارجع واكتب موقف بس قولي انتي اول الين مالاقي وقت وارجع اكتب عاد مواقفي كتير ههههههههههه

اوك

[محروم المنال]

بدأ يتهرب من الموضوع طيب هات اسرع موقف سار ليك عالماشي وبعدين فكر في غيرو والا مو موني

احشريه في الزاويه

محروووم

[لووليتاا]

انا سرلي موقف يموت من الضحك ايام المدرسه مره كنا انا وصاحبتي قال بنهبق من الحصه وسرنا ندور في المدرسه عشان ما نبغى ننكفش كان عندنا مدرسه قلق المهم سرنا ندور في النهايه تعبنا شفنا محد جانا قمنا قعدنا وضحك وسواليف وفجأه ماحسينا الا وحده مسكتنا من قفانا وعلى المديره اخدنالنا تهزيئه محترمه هههههههههههه

[محروم المنال]

ههههههههه

اصلا هيا كدا لمن الواحد يبغا شي مايلقاه ولمن يكوت مايبغاه تلاقي ماسك في قفاه

موقف ظريف لوليتا وهاتي غيرو لو فيه

محرووم

[موني]

ههه لوليتا والله ايام المدرسه ايام تهبيق ومشااااكل شكرا على مشاركتك واتمنى تشاركينا بموقف تاني

[lost-angel]

أوكي ياحلوين راح أحكي ليكم موقف أيام الجامعة بس محد يضحك عليا أوكي

وهما موقفين دوبي افتكرتهم بس حكتفي بموقف واحد

فيه محاضرة كانت الصباح وكانت المحاضرة مشتركة بين الأولاد والبنات
والغريب ان الدكتور اللي يدرسنا اربع محاضرات غايب واحنا مو عارفين ايش الحكاية وكلنا مبسوطين محد يبغا يروح يسأل

اكتشفنا ان الدكتور مات واترحمنا عليه ... وجابوا دكتور لينا تاني كان استاذ القسم كله والمهم درسنا محاضرة بعدها والثانية الا تأخر وجانا واحد قال ترى الدكتور مو جاي لأنه أبو مات كمان

كلنا تنحنا وخرجوا الاولاد وجلست انا وكم واحد اصحابي
وصرت اتريق طبعا كعادتي

وقلت دحين احنا نموت كمان والمحاضرين اللي جنبنا يموتوا والجامعة تموت والخ ............
ويدق التليفون

ونسيت انو المحاضرة منقولة وماتوقف الارسال والبنات والمشرفة سمعت الكلام كله وعلى طوووووووووووووووووووول هربنا
هههههههههههههههههههههههه

من جد يوم ماانساه كان من ايامي السودة لأني خفت انحط بلالاك ليست وانا كنت حتخرج قريب ههههههه

[لووليتاا]

ههههههههههههههههههههه من جد موقف محرج يلا تعيش وتاكل غيرها خخخخخخخ

[موني]

هههههههههه ملاك والله موقف يضحك ده مات وده مات هيا انتبهوا تموتوا انتوا كمان ههههههههه

[لووليتاا]

دوبي افتكرت موقف ايام المتوسطه كان على نهايه السنه كان باب الفصل حقنا لو انصك من جوه ما ينفتح من بره وكان علينا حصه تاريخ كنا نكره هدي الابله المهم شفناها طولت ما جات قامو البنات راحو سألوها تبغى تجي ولا لأ المهم قالتلهم دحين جايه قامت وحده من البنات شافتها جايه قامت قفلت الباب لمن قفلتوا انخلعت يد الباب
دحين محد انتبه والبنات فرحانين إننا ما راح ناخد حصه جات الابله تدق الباب البنات يستهبلوا يقولولها مو راضي ينفتح والبنت اللي خلعت اليد ساكته وبعد ما دقت دقت قرروا يفتحوا الباب وما لقوا اليد ساروا بنات يضحكوا وبنات يزعقوا في النهايه المديره فتحتوا و كالعاده اخدنا تهزيئه هههههههههه والله مواقف المدرسه ما تخلص وتنتهي بتهزيئه......

[lost-angel]

من جد انكم قوايا يالوليتا

بس اهم شي اتاخدت الحصة برضو ولا راحت .......؟

[لووليتاا]

الا اخدناها واحنا فاطسين ضحك

[lost-angel]

في النهاية اتاخدت يالوليتا
عشان فيه موقف مشابه صار ليا واخدنا الحصة وكانت اول حصة
بس انا سويت شي نيله مره هههههه :)

كسرت من الصبح الخدعة اللي تطلع ريحة والاستاذ حس انها خدعه
وسكر علينا الباب والشباك وزنقنا لين نهاية الحصة :(